دوایین هەواڵ و بابەت و نوێکارییەکانی تیمی نووسینمان ببینە.
بە بەشدارییەکی بەرفراوان، هەڵمەتی نیشتمانیی پاککردنەوەی "دەربەند" بە سەرکەوتوویی ئەنجامدرا. ئەمڕۆ چوارشەممە، ڕێکەوتی ٦ی ئایاری ٢٠٢٦، بە ئامانجی پاراستنی ژینگە و سیمای جوانی سروشتی دەڤەرەکە، هەڵمەتی فراوانی پاککردنەوەی ناوچەی گەشتیاریی "دەربەند" بە سەرکەوتوویی بەڕێوەچوو. ئەم کەمپەینە لەژێر چاودێری ڕاستەوخۆی سەرپەرشتیاری ئیدارەی ڕاپەڕین، لەلایەن بەڕێوەبەرایەتی گشتی گەشتوگوزاری ڕاپەڕین و بە هەماهەنگی لەگەڵ بەڕێوەبەرایەتی گشتی شارەوانییەکانی ڕاپەڕین ڕێکخرابوو. لە هەڵمەتەکەدا، کۆمپانیای بیڤان و دەیان ژینگەپارێز، ڕێکخراوەکانی کۆمەڵگەی مەدەنی، خۆبەخشان، و ژمارەیەکی بەرچاو لە بەرپرسانی حکومی و حیزبی و هاوڵاتیانی ناوچەکە بەشداربوون. ئامادەبووان پێکەوە دەستگیرۆیی یەکتر بوون بۆ کۆکردنەوەی پاشماوەکان و پاكکردنەوەی دەربەند ، وەک پەیامێک بۆ چەسپاندنی کلتوری ژینگەپارێزی و نیشاندانی ئەوەی کە پاراستنی ئەم سروشتە ئەرکی هاوبەشی هەمووانە. بەڕێوەبەرایەتی گشتی گەشتوگوزاری ڕاپەڕین سوپاس و پێزانینی بێپایانی خۆی ئاراستەی سەرجەم بەشداربووان، لایەنە پەیوەندیدارەکان، خۆبەخشان و ژینگەدۆستان دەکات کە بە دڵسۆزییەوە لەم پێناوەدا تێکۆشان.
فێستیڤاڵی ئەسپ سواری دەربەند: یەکەمین فێستیڤاڵی ڕێکخراو بوو لە دەڤەری ڕاپەڕین لە دەربەندی ڕانیە ئەنجامدرا لە بەرواری ٨-١١-٢٠٢٤ بەسەرپەرشتی بەڕێوەبەرایەتی گشتی گەشتوگوزاری ڕاپەڕین و بە هەماهەنگی لەگەڵ سوارچاکی دەڤەرەکەمان (فەرمان ئەبوبەکر) بە بەشداری ژمارەیەکی زۆر لە بەرپرسانی حکومی و حیزبی و گەشتیاران و ئارەزوومەندانی ئەسپ سواری. لە فێستیڤاڵەکەدا چەندین نمایشی ناوازە و تایبەت لە لایەن سوارچاکان و ئەسپە ڕەسەنە کوردییەکان پێشکەش کران ئەوەش بووە هۆی سەرنج ڕاکێشانی ئامادەبووان ئامانج لێی ڕاکێشانی گەشتیاران و ناساندنی ناوچە گەشتیارییەکانی سنوورەکە و بە تایبەت دەربەندی ڕانیە بوو، لە کۆتایی فێستیڤاڵەکەدا خەڵاتی ڕێزلێنان بەخشرا بە کۆمەڵێک سوارچاکی بەشداربووی فێستیڤاڵ، کە لەسەرجەم شار و شارۆچکەکانی هەرێمی کوردستان و ڕۆژهەڵاتی کوردستان هاتبوون.
یەکەمین فێستیڤاڵی گەشتیاری دەربەند: لە بەرواری ٢٥-٨-٢٠١٧ لەلایەن بەڕێوەبەرایەتی گەشت و گوزاری ڕاپەڕین بە هەماهەنگی لەگەڵ ژمارەیەک دامەزراوەی پەیوەندیداری سنوورەکەمان بە هەزاران گەشتیار تێیدا بەشداربوون، مەبەست لێی ناساندنی ناوچە گەشتیارییە سەرنجڕاکێشەکانی سنووری ئیدارەی سەربەخۆی ڕاپەڕین و ئاشناکردنیان بە گەشتیاران و سەردانیکاران سەبارەت بە شوێنە گەشتیارییەکانی ناوچەکە ئامادەکرابوو، چەندین چالاکی و بەرنامەی جۆراوجۆر و سەرنجڕاکێشی لەخۆگرت کە بەشداربووان و سەردانیکاران فێستیڤاڵەکەیان بە ئاوڕدانەوەیەکی تەواو جیاواز بینی، هیوای زیاتر بەرەوپێشچوونی کەرتی گەشتیارییان لە سنوورەکەدا خواست.
بەڕێوەبەرایەتی گشتی گەشتوگوزاری ڕاپەڕین و ڕێکخراوی ماڵی کەلەپووری و ڕۆشنبیری قەڵادزێ بە هەماهەنگی لەگەڵ بەڕێوەبەرایەتی ناحیەی هەڵشۆ و سەرۆکایەتی شارەوانی هەڵشۆ، یەکەمین ڤێستیڤاڵی گەشتیاری هەڵشۆیان بۆ کارە دەستییەکان و بەرهەمە خۆماڵی و خواردنە کوردییەکان سازکرد و تێیدا ڕەنگوکاڵای ڕەسەنی ناوچەکە نمایشکرا. شایەنی باسە ڤێستیڤاڵەکە بە ئامادەبوونی بەرچاوی بەرپرسانی حزبی و حکومی و کەسایەتییەکانی دەڤەرەکە بەڕێوەچوو، لە هەمان کاتدا بە سەدان گەشتیار و سەردانیکار لە شار و شارۆچکە جیاوازەکانەوە ڕوویان لەم ناوچە گەشتیارییە کرد. ئەم چالاکییە وەرچەرخانێکی گرنگ بوو بۆ ناوچەکە چونکە بۆ یەکەم جار بوو سەیرانگای هەڵشۆ بەم ڕێژە زۆرە و بەرچاوە پێشوازی لە گەشتیاران بکات و ببێتە ناوەندێکی گرنگی نمایشکردنی کولتوور و بەرهەمە ناوخۆییەکانی دەڤەری ڕاپەڕین.
یەکەمین فێستیڤاڵی گەشتیاری پەڕی بۆ کارە دەستییەکان و خواردنە کوردییەکان و بەرهەمە خۆماڵییەکان: لە پارکی دەروازە لە بەرواری ٢٣-١١-٢٠٢٣ لەلایەن بەڕێوەبەرایەتی گشتی گەشتوگوزاری ڕاپەڕین ڕێکخرا بە هاوبەشی لەگەڵ دامەزراوەی کەریمی عەلەکە، بە ئامادەبوونی (ئەمەل جەلال) سەرۆکی دەستەی گەشتوگوزاری کوردستان و بەرپرسانی حکومی و حیزبی سنووری ئیدارەی ڕاپەڕین و بە بەشداری ژمارەیەکی زۆر لە گەشتیاران و سەردانیکارانی ناوخۆ و بیانی کرایەوە. بۆ ماوەی سێ ڕۆژ بەردەوام بوو، بە نزیکەی ٢٠ هەزار گەشتیار و سەردانیکار سەردانیان کردووە بە مەبەستی کڕینی کارە دەستییەکان و بەرهەمە خۆماڵییەکان، ئەمەش بۆ ڕەخساندنی هەلی کار بۆ خانمانی دەست ڕەنگینی سنوورەکە. لە فێستیڤاڵەکەدا چەندین کاری دەستی و کارامەیی جیاواز و خواردنی کوردیەواری و کولتووری تێیدا لەلایەن خانمانی بەهرەمەند بۆ گەشتیاران و سەردانیکاران نمایشکران. ئەم فێستیڤاڵە تایبەت بوو بە تواناکانی خانمان لە دەڤەری ڕاپەڕین.
